Ndodh grabitja më e madhe në historinë e kriptovalutave, ja sa është vlera
Një sulm kibernetik ndaj Binance, platformës më të madhe në botë për tregtimin e kriptovalutave, ka rezultuar në vjedhjen e rreth 6.3 miliardë dollarëve në asete digjitale.
Ngjarja, e ndodhur më 29 tetor, konsiderohet grabitja më e madhe e regjistruar ndonjëherë në industrinë e kriptovalutave.
Sipas kompanisë amerikane të analizës së blockchain, TRM Labs, pas sulmit dyshohet se qëndron grupi i hakerëve koreano-veriorë “TraderTraitor”, i cili më parë është lidhur edhe me sulme të tjera ndaj platformave të kriptovalutave.
Hetimet paraprake tregojnë se pjesa më e madhe e vjedhjes është realizuar brenda vetëm 20 minutash. Gjatë kësaj kohe, sulmuesit kanë arritur të transferojnë miliarda dollarë nga portofolat digjitalë të Binance drejt adresave që kontrolloheshin prej tyre.
Sipas TRM Labs, në total janë transferuar rreth 6.36 miliardë dollarë në asete të shpërndara në dhjetë rrjete blockchain, përfshirë Bitcoin, Ethereum dhe Solana.
Një nga dyshimet kryesore të hetimit lidhet me komprometimin e një kompjuteri të përdorur nga një inxhinier i kompanisë, çka mund t’u ketë mundësuar sulmuesve të ndërhyjnë në sistemin që autorizon transaksionet.
Pas zbulimit të sulmit, Binance pezulloi përkohësisht depozitimet dhe tërheqjet në disa rrjete, ndërsa nisi bashkëpunimin me kompani të tjera të industrisë për të identifikuar dhe bllokuar asetet e vjedhura.
Deri më tani, kompanitë Tether, Circle dhe disa operatorë të tjerë kanë arritur të ngrijnë rreth 2.7 miliardë dollarë në kriptovaluta. Megjithatë, rreth 2.4 miliardë dollarë në Bitcoin dhe Ether vlerësohet se mbeten ende nën kontrollin e hakerëve.
Pavarësisht përmasave të sulmit, Binance ka deklaruar se fondet e përdoruesve do të mbrohen dhe se kompania do të mbulojë humbjet përmes fondit të saj të emergjencës dhe burimeve financiare të brendshme.
Ngjarja ka ndikuar edhe në tregun e kriptovalutave. Bitcoin regjistroi një rënie prej rreth 5% brenda 24 orëve, duke zbritur përkohësisht pranë nivelit të 77 mijë dollarëve, përpara se të rikuperonte një pjesë të humbjeve.
Përmasat e vjedhjes kanë bërë që incidenti të cilësohet nga ekspertë të industrisë si një prej grabitjeve më të mëdha financiare në histori.
Sulmi ndaj Binance ka tejkaluar ndjeshëm edhe vjedhjen prej rreth 1.5 miliardë dollarësh ndaj platformës Bybit në shkurt të vitit 2025, e cila deri tani mbante rekordin për humbjen më të madhe nga një sulm kibernetik në sektorin e kriptovalutave.
Ndërkohë, hetimet vijojnë për të përcaktuar mënyrën e plotë të realizimit të sulmit dhe për të gjurmuar fondet që ende nuk janë bllokuar.
Artikuj të ngjashëm
