Kush nga qeveritarët do të marrë pjesë në aktgjykimin ndaj ish-krerëve të UÇK-së?

Sytë tashmë janë drejtuar nga Haga, ku të mërkurën, në Dhomat e Specializuara të Kosovës, pritet të shpallet verdikti i shkallës së parë në rastin ndaj ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi.
Pas një procesi gjyqësor disavjeçar, vendimi i trupit gjykues pritet me interesim të madh, jo vetëm në Kosovë, por edhe në Hagë dhe më gjerë.
Nga Qeveria e Kosovës është konfirmuar se në Hagë, për ta përcjellë seancën, pritet të jenë zv/kryeministri dhe ministri i Jashtëm i Kosovës, Glauk Konjufca, si dhe Ministri për Punë, Familje dhe Vlera të Luftës Çlirimtare, Andin Hoti.
Lajmin e ka konfirmuar për RTK-në zëdhënësi i Qeverisë së Kosovës, Arlind Manxhuka. Konjufca dhe Hoti pritet të jenë të pranishëm në galerinë e Dhomave të Specializuara, prej nga do ta përcjellin shpalljen e verdiktit.
Ndërkohë, në Hagë tashmë kanë mbërritur familjarë të të akuzuarve, por edhe qytetarë të shumtë nga Kosova dhe diaspora. Ata pritet të marrin pjesë nesër në tubimin e paralajmëruar në Hagë, si dhe të jenë të pranishëm në ditën kur do të shpallet vendimi.
Artikuj të ngjashëm



Vulin pretendon se Gjakova është tokë serbe, Xharra sjell të dhëna historike
