“Ky Albini ‘i keq’ ua hoqi telat e muret” – Çun Lajçi thumbon kundërshtarët dhe ‘godet’ Grudën
Aktori Çun Lajçi ka reaguar ashpër ndaj ngërçit politik në Kosovë, duke kritikuar deputetët dhe veçanërisht Përparim Grudën.
Në një postim të gjatë, Lajçi e akuzon Grudën se po u bën thirrje deputetëve për të penguar formimin e Qeverisë nga Albin Kurti. Ai ka kritikuar gjithashtu qëndrimet e deputetëve ndër vite, duke i akuzuar për mungesë dinjiteti politik.
“Na duhet dinjitet, ore t’gjorë!”, ka shkruar Lajçi në fund të reagimit të tij, të publikuar më 17 gusht në Prizren.
Postimi i plotë:
Mysketerët!
Marash Pali s’ka nevojë ma me hipë n’thep e me shkrepë koburën.
Ai s’ka nevojë ma me thirrë:
— O ku jeni, Shala e shkretë?!…
Jo. Atë e ka zëvendësue Përparim Gruda.
Ai asht ba telalli i Vlorës, Gançes, Enverit, Blertës… e kollon kusurit.
Tash, çdo mëngjes, kemi me i pa “mysketerët” pa kuaj e pa shpata, a shtatë shaljanët pa xhamadana e pa kobure, tue shkelë randë sheshin e Gjergjit e tue shkue me ruejtë godinën që puthet me qiellin.
Por dallimi asht tepër i madh.
Marash Pali i thërriste shaljanët me shkue me shlirue Shkodrën nga Veziri. Përparimi po i thërret:
— Ejani t’i vemë prita, si cubat e malit, Albinit, që të mos bajë Qeveri e të mos ia vemë kapakun — Presidentin — shtetit!
Kështu nuk thërrisnin kur po prangoseshin Hashimi, Kadriu, Jakupi e Rexha.
Kështu nuk thërrisnin kur po falej Kulla e Çakorri. Madje, atë natë votimesh, u puthën buzë më buzë, si Tita, Brezhnjevi e Enveri!
Sa artistë palaço kjo ekipë deputetësh, që po ia shkërdhejnë djersën këtij populli!
Ejani n’shesh, te kuferi im me libra, t’ua knoj kangën:
“Na ka çu Dudia letër…”
A keni ftyrë, more ju që s’keni as prapanicë?!
Se edhe qentë e rrugëve po qeshin me ju.
Kapni tupanat e defat, shkoni n’Urën e Mitrovicës e gëzohuni që ky Albini “i keq” ua hoqi telat e muret, e ja që po lëshohet prej vetë Bashkimit Evropian.
Na duhet dinjitet, ore t’gjorë!
Se ua kemi mësue edhe andrrat, edhe dashnitë, edhe përqafimet, edhe shamjet.
Ah, nëpërkat që jeni!
Veç Zoti e di sa helm keni n’buzëqeshjet tueja.
Prizren, 17.08.2026