Gjermania arrestoi për “spinuazh” njeriun që ia drejtoi inteIigjencën nga 98’a- çfarë thoshte Hanning për Iuftën në Kosovë

Autoritetet gjermane e kanë arrestuar sot ish shefin e Inteligjencës August Hanning. Hanning kishte marrë detyrën si shef i BND-së gjermane në vitin 1998 dhe e kishte mbajtur atë pozitë për plotë 7 vjet, përfshirë këtu edhe periudhën e luftës në Kosovë.

Në arkivat e mediave, ekziston edhe një intervistë e Hanning e dhënë për gazetën “Focus” më 3 maj 1999, ku ai flet për luftën e Kosovës dhe angazhimin e inteligjencës gjermane.

Në këtë intervistë ai thotë se do të kishte qenë më i lumtur sikur lufta në Kosovë të mos ekzistonte, meqë i ka rënë të merret qysh në fillim të detyrës së tij në krye të BND-së, transmeton Express.

Hanning në këtë intervistë flet edhe për bashkëpunimin me agjencitë e inteligjencës, përfshirë atë të Rusisë, për dosjet e luftës që hartoheshin atë kohë dhe nëse kishin agjentë në rrethin e ngusht të Sllobodan Millosheviqit.

Intervista e plotë në FOCUS:
 FOCUS: Kriza jugosllave ju ka angazhuar që prej marrjes së detyrës, vetëm katër muaj më parë. A do të kishit dashur pak më shumë kohë për t’u ambientuar me detyrën?

Hanning: Jo. Konflikti në Kosovë nënvizon rëndësinë e informacionit të shërbimeve të inteligjencës. Dhe ndoshta tani disa njerëz në Bon, të cilët më parë spekulonin për aftësinë e BND-së, do të na shohin me sy disi tjetër. Megjithatë, natyrisht, do të isha i lumtur sikur të mos ekzistonte konflikti në Kosovë.

FOCUS: Kritikët e BND-së vazhdojnë të pretendojnë se ju vetëm prisni artikuj gazetash dhe, pasi u vendosni vulën “sekret”, i dërgoni dy ditë më vonë në Bon.

Hanning: Këto akuza natyrisht na irritojnë mua dhe punonjësit e mi. Sepse ne raportojmë intensivisht. Hartojmë raporte të posaçme, ndonjëherë dy ose tri në ditë.

FOCUS: Kush i merr këto dosje për luftën në Kosovë?

Hanning: Zyra e Kancelarit, Ministria e Jashtme, Ministria e Mbrojtjes dhe strukturat e tyre vartëse. Pra, ne informojmë udhëheqjen më të lartë në Bon. Ne nuk kopjojmë raportimet e mediave, por i verifikojmë ato rast pas rasti.

FOCUS: Pse?

Hanning: Sepse mediat janë gjithashtu pjesë e përballjes. Përmes mediave mund të manipulohet informacioni.

FOCUS: A ka shembuj dezinformimi?

Hanning: Le të marrim dëmet e luftës të raportuara nga jugosllavët. Ato gjithmonë paraqiten më të mëdha sesa janë në të vërtetë. Raportet nga Beogradi për rritjen e shkallës së dezertimit te ushtarët e Bundesëehr-it janë, natyrisht, primitive dhe lehtësisht të dallueshme; për këtë nuk nevojitet BND-ja.

FOCUS: Çfarë mendoni për zëdhënësin e NATO-s, i cili – gabimisht – njoftoi se ishin vrarë bashkëpunëtorë të politikanit shqiptar Rugova?

Hanning: Me sa duket, ai kishte rënë pre e një informacioni të rremë të ardhur nga njëra prej palëve të përfshira. BND-ja e informoi shumë shpejt qeverinë federale për këtë.

FOCUS: Sa të mira janë burimet tuaja në Beograd? A keni agjentë në rrethin e Millosheviqit?

Hanning: Kërkoj mirëkuptim që për këtë nuk mund të them asgjë.

FOCUS: A ju tregojnë amerikanët gjithçka? Ministri Scharping është ankuar ashpër për mangësi në shkëmbimin e informacionit.

Hanning: Zëvendësdrejtori i CIA-s më ka siguruar së fundmi edhe një herë se ne marrim materialet e rëndësishme.

FOCUS: Por nuk keni qasje të drejtpërdrejtë në të dhënat e zbulimit satelitor amerikan, për të cilin është folur aq shumë?

Hanning: Kështu është. Ne nuk e njohim të gjithë materialin. Por gjithashtu nuk kam arsye të mos u besoj amerikanëve.

FOCUS: Diskutimi politik për përdorimin e trupave tokësore në Kosovë vazhdon. Çfarë i keni rekomanduar kancelarit?

Hanning: Trupat tokësore nuk kanë qenë kurrë temë për ne këtu. Gjithashtu, nuk kemi marrë asnjëherë detyrë për të përgatitur në mënyrë analitike një përdorim të mundshëm të trupave tokësore.

FOCUS: A do të ishte Millosheviqi i përgatitur për këtë?

Hanning: Serbëve nuk u mungon personeli i kualifikuar. Ushtria jugosllave është e stërvitur mirë; gjatë periudhës së Bllokut Lindor ajo ishte trajnuar për vite me radhë për mbrojtjen ndaj një pushtimi. Pra, bëhet fjalë për mënyra luftimi që ushtria jugosllave i zotëron tradicionalisht.

FOCUS: A mund të ndalet kjo ushtri me embargon e naftës që sapo është vendosur?

Hanning: Përshtypja ime nuk është se gatishmëria luftarake e ushtrisë jugosllave do të vuajë në afat të shkurtër për shkak të mungesës së karburantit. Kosova është një territor i kufizuar dhe nuk ka nevojë të përshkohen distanca të mëdha. Për më tepër, ushtria ka në çdo kohë mundësi të konfiskojë edhe karburantet civile.

FOCUS: Moska ndihet e provokuar nga bombardimet e NATO-s. A po shndërrohen shërbimet sekrete ruse në kundërshtarë të rinj të BND-së dhe aleancës perëndimore?

Hanning: Nuk besoj. Shërbimet ruse mendojnë qartë në bazë të interesave.

FOCUS: Çfarë do të thotë kjo?               

Hanning: Ata dhe ne do të bëjmë gjithçka që linja e komunikimit të mos ndërpritet. Unë personalisht mbaj qëndrimin se pikërisht në situata krizash kontaktet mes shërbimeve të inteligjencës janë veçanërisht të rëndësishme.

FOCUS: Pra, a keni kontakte me shërbimin sekret jugosllav?

Hanning: Për këtë nuk dua të them asgjë. Ne nuk kemi më rezident në terren.

FOCUS: Çfarë bëjnë në të vërtetë rezidentët tuaj të tjerë nëpër botë?

Hanning: Përveç Kosovës, BND-ja natyrisht ka edhe shumë objektiva të tjera zbulimi. Na intereson se çfarë po ndodh në disa shtete të Lindjes së Afërt dhe të Mesme. Ne analizojmë zhvillimet politike, për shembull tani në Algjeri. Ne vëzhgojmë përpjekjet e shumë shteteve për të prodhuar armë të shkatërrimit në masë.

FOCUS: Kush është veçanërisht aktiv?

Hanning: Aktualisht na shqetëson shumë Koreja e Veriut. Ne shohim se Koreja e Veriut po eksporton në mënyrë masive armatime raketore.

FOCUS: Ku?

Hanning: Për shembull në Lindjen e Afërt dhe të Mesme. Koreja e Veriut është përgjithësisht një eksportuese aktive në mbarë botën dhe ky është një problem i madh. Një raketë me rreze të mesme veprimi mund të arrijë nga Libia deri në Evropën Qendrore, deri në Mynih. Nuk duhet të harrojmë vendet që po punojnë për zhvillimin e armëve të shkatërrimit në masë. Iraku i ka përdorur këto armë në luftën kundër Iranit, duke shkaktuar dhjetëra mijëra të vdekur.

FOCUS: Çfarë ju ka shqetësuar më së shumti deri tani në detyrën tuaj të re, përveç krizës në Kosovë?

Hanning: Më ka shqetësuar që nuk kemi mundur t’i informojmë më herët autoritetet gjermane të sigurisë për arrestimin e kreut të PKK-së, Öcalan, në Kenia dhe dërgimin e tij në Turqi.

FOCUS: Një dështim i madh i BND-së?

Hanning: Jo. Më është dashur të konstatoj se arrestimi ishte një operacion i mbajtur i izoluar nga shërbime të tjera.

FOCUS: E keni fjalën për amerikanët dhe turqit?

Hanning: Ua kam shprehur shumë qartë mendimin tim të gjithë të përfshirëve. Kisha përshtypjen se pasojat e arrestimit të Öcalan-it për sigurinë e brendshme të Gjermanisë ishin vlerësuar gabimisht.

FOCUS: A kërcënojnë akte të reja dhune me fillimin e gjyqit ndaj Öcalan-it?

Hanning: Është e vështirë të parashikohet. PKK-ja ndjek një strategji të dyfishtë: lufton me mjete ushtarake në Turqi dhe aktualisht mbetet paqësore në Evropë. Nga ana tjetër, ka pjesë të PKK-së që tashmë kërkojnë një qasje më të ashpër. Për mua është e qartë: sa më e ashpër të jetë represioni në Turqi, aq më e vështirë mund të bëhet situata edhe për sigurinë tonë të brendshme.

FOCUS: Kohët e fundit është bërë e qetë rreth Osama bin Ladenit, për shumëkënd kreu më i keq i terrorizmit. Çfarë po ndodh me të?

Hanning: Ne vazhdojmë ta konsiderojmë atë një kërcënim të madh. Personalisht kam frikë se së shpejti mund të përballemi edhe me sulme nga ky sektor.

FOCUS: Edhe në fushat tuaja ka trazira. A vazhdon rezistenca ndaj zhvendosjes së departamentit të vlerësimit dhe analizës nga Mynihu në Berlin?

Hanning: Mund të imagjinohet që jo të gjithë punonjësit janë të entuziazmuar. Kjo nuk është ndryshe as në BND sesa në ministritë e Bonit. Zhvendosjet sjellin ndryshime në mënyrën e jetesës, të cilat veçanërisht për punonjësit me të ardhura më të ulëta paraqesin probleme të mëdha. Ne merremi me rastet e veçanta.

FOCUS: Çfarë u thoni atyre që kundërshtojnë më së shumti?

Hanning: Nga një punonjës i shërbimit të inteligjencës, i cili mund të dërgohet për punë në Mogadishu, Nairobi apo Ëashington, pres gjithashtu që të zhvendoset në kryeqytetin gjerman.

FOCUS: A është kaq i palëvizshëm stafi juaj?

Hanning: Aspak. Disa prej atyre që tani tallen me të ashtuquajturën mungesë mobiliteti të personelit të BND-së, do të kuptojnë se BND-ja do të mbërrijë në Berlin me punonjës të përkushtuar dhe kreativë dhe do ta marrë përsipër rolin e vet.

FOCUS: Çfarë ju shtyn kaq vendosmërisht drejt Berlinit?

Hanning: Duhet t’i afrohemi më shumë qeverisë federale. Duhet ta intensifikojmë edhe më tej dialogun. Është thjesht një ndryshim nëse duhet të komunikoj mbi një distancë prej më shumë se 600 kilometrash apo nëse mund të caktoj drejtpërdrejt një takim me dikë. BND-ja duhet të jetë, po e them kështu, edhe miqësore ndaj klientit.

FOCUS: Kush duhet të jenë klientët tuaj përveç qeverisë?

Hanning: Nëse një ministër apo deputet udhëton jashtë vendit, në rajone kritike, do të doja t’u ofroja mundësinë që paraprakisht të informohen nga BND-ja. Jo me shkrim, por përmes një informimi gojor.

FOCUS: Pra, një shërbim vetëm për VIP-at?

Hanning: Jo, një shërbim për vendimmarrësit politikë. Përveç kësaj, në Berlin planifikoj një qendër informacioni, ku çdokush do të ketë mundësi të informohet për punën e BND-së.

FOCUS: Çdokush, nga një klasë shkolle deri te një shoqatë pensionistësh?

Hanning: Po, çdokush. Mund të imagjinoj edhe ligjërata profesionale dhe informacione për vende të ndryshme…

FOCUS: Për shembull, për pushimet e ardhshme në Turqi?

Hanning: Ne do të informojmë për një shërbim modern të inteligjencës. Nuk besoj se do t’i bëjmë konkurrencë ADAC-ut në planifikimin e udhëtimeve.