Rihapet pas 27 vitesh dosja e vrasjes së gazetares së BBC-së, dyshimet çojnë te serbi “Legija”

Policia britanike ka rihapur hetimet për vrasjen e prezantueses së BBC-së, Jill Dando, 27 vite pas krimit që vijon të mbetet i pazbardhur. Hetuesit po rishqyrtojnë provat e mbledhura në atë kohë, përfshirë pamjet e kamerave të sigurisë, në përpjekje për të identifikuar një person të dyshuar që u filmua pak pas vrasjes.

Në fokus të hetimit të ri janë pamjet e regjistruara pranë stacionit të metrosë Putney Bridge në Londër, ku një person i dyshimtë ishte filmuar rreth 20 minuta pas momentit kur Dando ishte qëlluar për vdekje pranë banesës së saj.

Përparimet në teknologjinë e përpunimit dhe përmirësimit të imazheve CCTV u kanë dhënë hetuesve mundësinë që të rishqyrtojnë materialin origjinal me një cilësi më të lartë, me shpresën se mund të përcaktohet më qartë identiteti i personit të filmuar.

Rihapja e kësaj piste vjen pas një investigimi trevjeçar të gazetës “Mirror”, e cila ka ngritur dyshime se personi i regjistruar në pamjet e kamerave mund të ketë ngjashmëri me Milorad Ulemekun, i njohur me nofkën “Legija”, ish-pjesëtar i Legjionit të Huaj Francez dhe një figurë e njohur e strukturave paramilitare serbe.

Dy dëshmitarë kanë deklaruar më herët për “Mirror” se besojnë se personi që panë pranë vendit të vrasjes mund të ketë qenë Ulemeku. Ndërkohë, një analist i videove forenzike ka evidentuar ngjashmëri mes personit të filmuar dhe Ulemekut, duke përmendur formën e gojës, mjekrën, vijën e flokëve, hundën dhe veshin.

Megjithatë, deri tani nuk ka prova publike që e lidhin Ulemekun me vrasjen e Jill Dandos dhe dyshimi mbetet një nga pistat e raportuara në kuadër të investigimit mediatik.