Statistika e çuditshme: Në cilën orë ndodhin më shpesh aksidentet në Shqipëri?

Aksidentet rrugore në Shqipëri kanë shënuar rritje gjatë tetë muajve të parë të vitit 2026, ndërsa të dhënat e fundit të INSTAT tregojnë edhe një detaj interesant për oraret kur ndodhin më shpesh.

Nga janari deri në gusht janë regjistruar 983 aksidente rrugore, kundrejt 926 në të njëjtën periudhë të vitit të kaluar. Kjo përkthehet në një rritje prej 6.2%. Edhe numri i personave të vrarë dhe të plagosur është rritur, nga 1,306 në 1,378.

Por gushti ka sjellë një tendencë ndryshe. Gjatë këtij muaji u regjistruan 139 aksidente, 12.6% më pak krahasuar me 159 raste në gusht të vitit 2025. Numri i të vrarëve dhe të plagosurve gjithashtu ra nga 229 në 191 persona.

Ajo që bie në sy në statistikat e gushtit është pikërisht ora kur ndodhin aksidentet. Sipas INSTAT, intervali 19:00-24:00 rezulton më problematiku, pasi gjatë këtyre pesë orëve kanë ndodhur 20.1% e të gjitha aksidenteve të muajit.

Edhe dita e javës duket se bën diferencë. E hëna mban vendin e parë, me 18% të aksidenteve, ndërsa e mërkura dhe e premtja rezultojnë ditët me përqindjen më të ulët, me nga 11.5%.

Të dhënat tregojnë gjithashtu se 86.3% e aksidenteve të gushtit lidhen me sjelljen e drejtuesve të mjeteve. Grupmosha 25-34 vjeç zë peshën më të madhe, me 31.7% të rasteve të regjistruara gjatë muajit.

Në nivel qarqesh, rritja më e dukshme gjatë periudhës janar-gusht është regjistruar në Tiranë dhe Durrës. Tirana arriti në 369 aksidente, nga 270 një vit më parë, ndërsa Durrësi regjistroi 98, kundrejt 62 rasteve në të njëjtën periudhë të vitit 2025.

Në të kundërt, disa qarqe kanë shënuar ulje. Shkodra zbriti nga 75 në 45 aksidente, Korça nga 91 në 70, ndërsa Lezha nga 126 në 115.

INSTAT sqaron se të dhënat e muajit të fundit për personat që kanë humbur jetën në aksidente janë paraprake dhe mund të rishikohen.