Bilanc i frikshëm në Francë, studentët rrahin 32 mësues, 83 policë të lënduar dhe 625 arrestime!

Protestat e nxënësve dhe studentëve në Francë janë përshkallëzuar ndjeshëm, duke shkaktuar përplasje me policinë, ndërprerje të mësimit dhe dëme të shumta materiale në disa qytete të vendit.

Mijëra nxënës kanë dalë në rrugë për të protestuar kundër mungesës së mësuesve, mbipopullimit të klasave dhe gjendjes së amortizuar të ndërtesave shkollore. Protestat, që nisën javën e kaluar në Paris, janë përhapur edhe në qytete të tjera, përfshirë Montpellier, Nantes, Marsejë dhe Strasburg.

Sipas të dhënave më të fundit, 625 persona janë arrestuar, ndërsa 83 efektivë policie janë sulmuar gjatë përleshjeve. Gjithashtu, 32 mësues kanë mbetur të plagosur.

Situata është përkeqësuar në disa zona, ku janë regjistruar akte dhune dhe vandalizmi. Janë raportuar qindra shkolla të djegura, ndërsa në disa qytete janë vënë flakët edhe automjeteve dhe objekteve fetare, përfshirë kisha.

Në Belfort, në verilindje të Francës, një 17-vjeçar u arrestua nën dyshimin për tentativë vrasjeje pas sulmit ndaj një oficeri policie pranë një shkolle. Pamjet e verifikuara nga BBC tregojnë një grup të rinjsh duke ndjekur oficerin, i cili rrëzohet në tokë dhe më pas goditet disa herë me grushte dhe shkelma.

Në periferinë pariziane të Pantin-it, policia ndërhyri ndaj protestuesve pasi ndaj efektivëve u hodhën sende të ndryshme, ndërsa në Strasburg u përdor gaz lotsjellës për të shpërndarë turmat.

Në Rennes dhe Paris janë djegur kosha plehrash, ndërsa raportime të tjera flasin për automjete dhe kisha të përfshira nga flakët.

Ministri francez i Drejtësisë, Gérald Darmanin, deklaroi se situata kishte kaluar nga protesta të nxënësve të shkollave të mesme në një çështje të rendit publik.

Protestuesit, nga ana tjetër, këmbëngulin se kërkesat e tyre lidhen me kushtet në sistemin arsimor. “Për sa na përket ne, kemi fituar; shkolla jonë është e mbyllur këtë mëngjes”, deklaroi për AFP Lola, një protestuese 16-vjeçare.

Ajo kritikoi edhe ndërhyrjen e policisë, duke thënë se përdorimi i forcës dhe gazit lotsjellës ka shtuar zemërimin e protestuesve.