Irani kundërpërgjigjet ndaj SHBA-së, sulmon me raketa dhe dronë objektivat amerikane në Jordani e Irak

Pas rifillimit të goditjeve amerikane ndaj Iranit, Teherani shënjestroi objektiva të SHBA-së në Jordani, Kuvajt, Irak dhe Bahrein, ndërsa tensionet ushtarake në rajon u përshkallëzuan.

Teherani ka lëshuar raketa dhe dronë drejt objektivave amerikane në Jordani, Kuvajt, Irak dhe Bahrein. Sulmet erdhën pasi forcat amerikane rifilluan të martën goditjet kundër Iranit.
Gjysmëhëna e Kuqe iraniane njoftoi se pesë persona, mes tyre një fëmijë, u vranë dhe më shumë se 50 të tjerë u plagosën pasi copëzat e një rakete amerikane goditën një banesë ku po zhvillohej një ceremoni martese në Sirik, në jug të Iranit.

Ushtria amerikane deklaroi se ishte në dijeni të raportimeve, por theksoi se nuk shënjestron civilët.

Komanda Qendrore e SHBA-së (CENTCOM) tha se goditjet amerikane ndaj Iranit pasuan “përpjekjet e fundit për sulme” nga Korpusi i Gardës Revolucionare Islamike (IRGC) kundër anijeve tregtare në Ngushticën e Hormuzit dhe forcave amerikane në rajon.

IRGC-ja deklaroi se Shtetet e Bashkuara do të “pendohen” për goditjet. Sipas agjencisë gjysmëzyrtare iraniane Tasnim, deri në orët e para të së mërkurës Irani kishte lëshuar një seri raketash balistike drejt një baze të marinsave amerikanë në Aqaba të Jordanisë, si kundërpërgjigje ndaj sulmit në Sirik.

Forcat e Armatosura të Jordanisë njoftuan se kishin interceptuar 13 raketa balistike. Dhjetë prej tyre u shkatërruan, ndërsa tri ranë në zona të largëta. Autoritetet jordaneze thanë se sulmi iranian nuk shkaktoi viktima apo të plagosur.

Qendra Kombëtare e Sigurisë në Jordani paralajmëroi banorët e provincave Aqaba dhe Mafraq për rrezikun nga rënia e mbetjeve të raketave. Paralajmërimi u hoq më vonë.

Ndërkohë, ushtria e Kuvajtit njoftoi se sistemet e saj të mbrojtjes ajrore po reagonin ndaj sulmeve iraniane me raketa në orët e para të së mërkurës. Media shtetërore iraniane raportoi gjithashtu disa shpërthime në Bahrein pas sulmeve të Iranit.

Në rajonin autonom të Kurdistanit në Irak, Garda Revolucionare iraniane deklaroi të mërkurën se kishte goditur me raketa dhe dronë baza amerikane. Sipas agjencisë shtetërore iraniane IRNA, sulmet shkatërruan një qendër mirëmbajtjeje, magazina dhe pajisje.

Presidenti amerikan Donald Trump, kur u njoftuan goditjet amerikane të martën pasdite, paralajmëroi se Irani do të goditej përsëri në një nivel “shumë më të ashpër dhe më të lartë” nëse do të kundërpërgjigjej.

Zhvillimet pasojnë goditjet e para të njohura amerikane ndaj Iranit që prej fundit të korrikut. Në fillim të kësaj jave, forcat amerikane sulmuan dy lëshues raketash në ishullin Larak, në Ngushticën e Hormuzit. Teherani u kundërpërgjigj duke lëshuar raketa drejt bazave ajrore në Jordani dhe një dron drejt Emirateve të Bashkuara Arabe.

CENTCOM njoftoi se forcat amerikane nisën goditjet ndaj objektivave të IRGC-së në orën 12:00 sipas kohës së Bregut Lindor të SHBA-së, ose 16:00 GMT, dhe i përfunduan ato në orët e para të së mërkurës.

Media shtetërore iraniane raportoi se predha goditën zonat e Chabahar dhe Konarak, si dhe një aeroport në Jiroft. Shpërthime u raportuan gjithashtu në ishullin Qeshm dhe në Bandar Abbas.

Media shtetërore dhe Gjysmëhëna e Kuqe iraniane raportuan se u goditën edhe zona civile përgjatë bregdetit jugor të Iranit. Sipas tyre, mes viktimave ishte edhe një fëmijë që ndodhej në ceremoninë e martesës në Sirik, pranë Ngushticës së Hormuzit.

Kapiteni i Marinës amerikane Tim Hawkins, duke folur në emër të CENTCOM-it, i tha BBC-së se ushtria amerikane ishte në dijeni të raportimeve të medias shtetërore iraniane për incidentin në Sirik.

“Ushtria amerikane nuk shënjestron kurrë civilët, ndryshe nga IRGC-ja”, deklaroi Hawkins.

SHBA-ja dhe Izraeli nisën më 28 shkurt një seri të gjerë goditjesh kundër Iranit. Teherani u kundërpërgjigj duke sulmuar Izraelin, bazat amerikane dhe shtetet aleate të SHBA-së në Gjirin Persik, ndërsa praktikisht bllokoi trafikun detar në Ngushticën e Hormuzit.

Në qershor, SHBA-ja dhe Irani nënshkruan një marrëveshje të njohur si Memorandumi i Mirëkuptimit, e cila synonte zgjatjen e armëpushimit mes dy vendeve.

Megjithatë, marrëveshja ka skaduar dhe armiqësitë kanë rifilluar. Si SHBA-ja, ashtu edhe Irani kanë goditur gjithashtu anije. Teherani ka shënjestruar mjete lundruese që, sipas tij, janë përpjekur të kalojnë nëpër Ngushticën e Hormuzit pa lejen iraniane, ndërsa SHBA-ja po zbaton një bllokadë detare ndaj porteve të Iranit.

Uashingtoni njoftoi më 24 gusht edhe një fushatë të re sanksionesh, me synimin për të izoluar më tej Teheranin dhe për të zgjeruar sanksionet dytësore ndaj aleatëve të tij.

Duke folur në një takim të ministrave të Financave të G20-s, Sekretari amerikan i Thesarit, Scott Bessent, tha se shumë aleatë të SHBA-së kishin deklaruar se “do të bëjnë gjithçka që është e nevojshme” në lidhje me sanksionet kundër Iranit.

Zyrtarët iranianë dhe media shtetërore e kanë paraqitur kryesisht fushatën e re të sanksioneve si vazhdimësi të masave të mëparshme ekonomike amerikane, të cilat, sipas Teheranit, pasuan dështimin ushtarak të Uashingtonit në konfliktin e fundit.

Megjithatë, të martën media shtetërore citoi presidentin iranian Masoud Pezeshkian të thoshte se, nëse SHBA-ja rikthehet te respektimi i marrëveshjes, edhe Irani do të veprojë në të njëjtën mënyrë./BBC