SHBA godet cisternat iraniane, Irani nuk ia ‘përton’ dhe lëshon 20 raketa drejt bazës amerikane

Përplasja mes Shteteve të Bashkuara dhe Iranit është përshkallëzuar pas një serie sulmesh në Gjirin e Omanit dhe në rajon. Forcat amerikane goditën pesë cisterna iraniane, duke fundosur njërën prej tyre, ndërsa Irani iu përgjigj me raketa drejt një baze amerikane në Jordani.

Forcat amerikane goditën të martën pesë cisterna iraniane. Katër prej tyre ndodheshin në Gjirin e Omanit, ndërsa një tjetër u godit pranë ishullit Kharg, një nga pikat kryesore të eksportit të naftës iraniane. Njëra prej cisternave u fundos.

Sipas autoriteteve amerikane, anijet ishin të lidhura me Gardën Revolucionare Islamike të Iranit dhe pjesë e një rrjeti që, sipas Uashingtonit, financon Gardën Revolucionare dhe grupet aleate të Teheranit në rajon.

SHBA e lidhi sulmin me dy përpjekje të Iranit për të goditur një anije luftarake amerikane.

Pas sulmeve, Irani lëshoi 20 raketa drejt një baze amerikane në Jordani. Autoritetet jordaneze thanë se 18 prej tyre u interceptuan, ndërsa dy ranë në zona të pabanuara.

Nuk u raportuan viktima nga ky sulm.

Ndërkohë, Garda Revolucionare iraniane tha se kishte sulmuar dy anije amerikane, tetë cisterna nafte dhe 10 anije të tjera, të cilat sipas saj nuk iu bindën paralajmërimeve për kalim në Ngushticën e Hormuzit.

Tensionet janë shtrirë edhe në vende të tjera të rajonit. Rebelët Houthi, të mbështetur nga Irani, sulmuan objekte energjetike dhe infrastrukturë civile në Arabinë Saudite. Autoritetet saudite raportuan 73 të plagosur dhe zjarre në disa instalime nafte, duke pezulluar përkohësisht operacionet.

Përplasja u zhvillua në një kohë kur tensionet në Ngushticën e Hormuzit janë rritur. Marina iraniane pretendoi se kishte kapur një nëndetëse amerikane pa ekuipazh, por SHBA sqaroi se bëhej fjalë për një dron nënujor që kishte pësuar defekt më shumë se një ditë më parë.

Sipas palës amerikane, droni ishte një model i vjetër, nuk kishte mbledhur të dhëna të ndjeshme dhe nuk transportonte pajisje të klasifikuara.