BE i reagon Daçiqit për “flamurin serb mbi Prizren” dhe i kërkon Serbisë ta arrestojë Radoiçiqin: Shqetësuese që u pa në tubimin e SNS-së
Bashkimi Evropian ka kërkuar nga Serbia që të ndërmarrë veprime për arrestimin dhe ndjekjen penale të personave përgjegjës për sulmin në Banjskë, përfshirë Milan Radoiçiqin.
Qëndrimi i Brukselit është dhënë në një përgjigje për Gazetën Express, pas interesimit të këtij mediumi lidhur me deklaratën e politikanit serb Ivica Daçiq se flamuri serb do të valvitet mbi Prizren.
Sipas përgjigjes që BE-ja i ka dhënë Gazetës Express, nga udhëheqësit politikë pritet sjellje e përgjegjshme, e cila ndihmon në forcimin e besimit, stabilitetit rajonal dhe normalizimin e marrëdhënieve ndërmjet Kosovës dhe Serbisë.
Brukseli ka shprehur gjithashtu keqardhje që autoritetet serbe nuk kanë ndërmarrë ende veprimet e nevojshme për arrestimin dhe ndjekjen penale të personave të përfshirë në sulmin e vitit 2023 në Banjskë.
Në përgjigjen për Express, BE-ja ka shprehur shqetësim edhe për raportimet mbi praninë e Milan Radoiçiqit në një tubim parazgjedhor të Partisë Përparimtare Serbe (SNS), që udhëhiqet nga Aleksandar Vuçiq.
Bashkimi Evropian pret që Serbia të bashkëpunojë përmes mekanizmave të ndihmës së ndërsjellë juridike dhe të veprojë pa vonesa për këtë çështje./Gazeta Express
Artikuj të ngjashëm
