Luizi Ejlli reagon për protestat në Tiranë, mesazh i fortë për Ramën: “Përgjegjësia nuk mund të japë dorëheqjen!”
Këngëtari Luiz Ejlli ka reaguar për protestat e fundit në Tiranë, duke përcjellë një mesazh të drejtpërdrejtë për kryeministrin Edi Rama dhe duke kërkuar përgjegjësi për incidentet e raportuara gjatë tubimeve.
Përmes një postimi në Instagram Story, Luizi është ndalur te situata e krijuar gjatë protestave, veçanërisht te raportimet për të mitur dhe efektivë policie të lënduar.
“Kur në rrugë lëndohen të mitur dhe policë, nuk mjafton të numërosh ditët e protestës… duhet të numërosh përgjegjësitë”, shkruan këngëtari.
Në vijim, ai i është referuar edhe qëndrimit të kryeministrit për të mos dhënë dorëheqjen, duke theksuar se qytetarët kanë të drejtë të kërkojnë përgjigje nga institucionet.
“Të thuash ‘nuk jap dorëheqjen’ është e drejtë e një kryeministri, por qytetarët kanë po aq të drejtë të pyesin se: kush përgjigjet kur protesta kthehet në tragjedi, kush mbron jetën dhe kush ka guximin të dëgjojë?”, vijon reagimi i tij.
Luizi e ka përmbyllur mesazhin me një deklaratë që duket se i drejtohet drejtpërdrejt kreut të qeverisë:
“Pushteti mund të refuzojë të largohet, por përgjegjësia nuk mund të japë dorëheqjen!”
Me këtë reagim, këngëtari i është bashkuar diskutimit publik për protestat, duke e vendosur theksin te siguria e pjesëmarrësve dhe përgjegjësia e autoriteteve për ngjarjet e ndodhura.
Artikuj të ngjashëm
