Gjykata Kushtetuese merr vendimin e fortë për Sali Berishën

Gjykata Kushtetuese ka pranuar pjesërisht kërkesën e kreut të Partisë Demokratike, Sali Berisha, lidhur me masën e sigurisë “Detyrim për paraqitje”, duke vendosur rikthimin e çështjes për rishqyrtim në Gjykatën e Lartë.

Në arsyetimin e saj, Gjykata Kushtetuese ka vlerësuar se masa e sigurisë “Detyrimi për t’u paraqitur në Policinë Gjyqësore” përbën një ndërhyrje në lirinë e lëvizjes, e cila garantohet nga neni 38 i Kushtetutës.

Sipas Gjykatës, në shqyrtimin e mëparshëm, Gjykata e Lartë nuk u kishte dhënë përgjigje të mjaftueshme pretendimeve që lidheshin me nevojën dhe përshtatshmërinë e kësaj mase ndaj Berishës.

Për këtë arsye, Gjykata Kushtetuese ka vendosur të shfuqizojë vendimin përkatës të Gjykatës së Lartë dhe ta kthejë çështjen për një shqyrtim të ri, ku duhet të merren parasysh problematikat e evidentuara.

Megjithatë, vendimi nuk nënkupton heqjen automatike të masës së sigurisë ndaj Sali Berishës. Gjykata Kushtetuese nuk ka vendosur drejtpërdrejt për përfundimin e saj, por ka kërkuar që Gjykata e Lartë të rivlerësojë argumentet mbi domosdoshmërinë dhe përshtatshmërinë e kufizimit.

Tashmë, çështja do të rikthehet në Gjykatën e Lartë, e cila duhet të japë një arsyetim të ri duke marrë në konsideratë standardet kushtetuese për mbrojtjen e lirisë së lëvizjes.

Vendimi përbën një zhvillim të rëndësishëm në procesin gjyqësor të Berishës, ndërsa mbetet për t’u parë se cili do të jetë qëndrimi i Gjykatës së Lartë pas rishqyrtimit.