Ben-Meir për rastin e Arlinda Zekajt: Çfarë turpi për një vend që ka luftuar aq fort për liri!
Profesori i marrëdhënieve ndërkombëtare, Alon Ben-Meir, ka reaguar pas humbjes së jetës së Arlinda Zekajt, duke kritikuar institucionet e Kosovës për dështimin në mbrojtjen e grave nga dhuna në familje.
Në një postim në Facebook, ai ka thënë se Kosova, e cila ka kaluar luftë, përndjekje dhe vuajtje të jashtëzakonshme për liri, nuk duhet të pranojë një realitet ku gratë nuk janë të sigurta as në shtëpitë e tyre.
Sipas Ben-Meirit, Zekaj kishte kërkuar mbrojtje nga autoritetet dhe kishte paralajmëruar se jeta e saj ishte në rrezik. Ai shkruan se ajo u privua nga jeta tri ditë pas apelit të fundit, ndërsa po përpiqej ta merrte sërish djalin e saj nga familja e bashkëshortit.
Duke iu referuar raportimeve se tetë gra kanë humbur jetën nga dhuna në familje këtë vit, Ben-Meir e ka cilësuar situatën si “turp kombëtar”.
“Një vend që luftoi për lirinë e vet nuk duhet të pranojë kurrë një realitet në të cilin grave të tij u mohohet liria më themelore nga të gjitha: e drejta për të jetuar”, ka shkruar ai.
Artikuj të ngjashëm
